قیمتی سک
قیمتی سک (۱۸۸۵)
بؤگۊتهکس: آنتؤن چخؤو
یته کؤهنه سرباز «ستوان دۊبؤو» نامی ؤ یته افسر «کناپس» نامی، عرقفرۊشی مئن نیشته بؤن ؤ عرق خؤردن. دۊبؤو هۊته که «میلکا» خۊ سکء کناپسء نشؤن دأ، گۊت:
-ای سک معرکه هیسه! اینی مۊسؤن سک دس چرخ نیأنه! این ٚ میتۊرهء بئین! هی میتۊره خؤره کلی أرزنه! کافی هیسه یته سکشناس می گیر دکه تا هی میتۊره وأسر دویست رۊبل دنه می دس! باور نؤکۊنی، نیه؟ گمؤن نؤکۊنم تی سر دربؤشۊن.. .
-می سر درشۊنه ولی آخر..
-چره دقت نؤکۊنی! این یته معمۊلی سک نیه. سیتر هیسه! ایجۊر که این خۊ پا سر راسه هیسنه، هیچ سکی نئسنه! بۊیایی اینی حرف ندأره! دؤنی، وقتی کۊتکه بؤ اینˇ هئنˇ ره چندی پۊل هدأم؟ صد رۊبل! سکئه خیلی خۊبه! میلکا! میلکا جؤن! بیه می ور.. بیه ایه.. می جؤن ٚ سکئه..
ایسه ایندر دۊبؤو میلکا' خۊ ور کشنه، سکˇ گۊشانء خۊشأدنه ؤ ایمه یهپاره دۊمبالترئه بۊرمهأکنه ؤ اینی چۊشمان ٚ جی آسۊره کلنه.
-می ما مۊسؤنˇ سکئه، نترس. هرگس تره کسیء ندنم. می خۊجیر سکئه! دؤنم که ترأنی مره دۊس دأری میلکا، نیه؟ بئینم مره دۊس دأری یا نه؟..
اما یکدریک جره دنأ:
-ایسه بؤشۊ اۊوستر! تی اۊ کثیف ٚ بالء می کؤتء وأنسین! آها کناپس.. گۊته دؤبؤم.. صدؤپنجا رۊبل هی تۊلله وأسر هدأم! مرأنی دؤنی که مۊفتˇ پۊل کسیء ندنم. فقط حیف که شکار شؤن ٚ ره وقت ندأرم! می سکئه حیفآبۊنه؛ اینی استعداد هدر شۊنه.. هیندؤنی خأنم وره بفرشم؛ کناپس بهین ؤ یه عۊمر می دۊعاگۊ بؤبۊ! خؤ أخر تی پۊل وس نیه، همهء نخأنه هدی.. پنجاه رۊبل هدی ؤ خیر بئین! راسوری مره غارت بؤکۊن!
کناپس آه دؤبؤر آوجأدأ:
-نه جؤن.. أخر شیمی میلکا جؤن نر بی، شاید بهئه بی ولی..
ستوان یته واغآبؤ قیافه بگیت ؤ بؤگۊت:
-اختیار دأری! فرمانی میلکا نر نیه؟ تی حال خۊشه؟ چۊته نر نیه!؟ یعنی میلکا مئلی سکه؟ أیخاکه! تۊ خۊجیر جوانی ولی حیف هلأ نر ؤ مادهء دؤنسه مننی.
کناپس دلگیر بؤبؤ ؤ بؤگۊت:
-یهجۊر می همرأ گب نزن که عینˇ خۊدی مۊ تر-وچه ببی یا کۊر.. ایمهچی که این مئلی سکه.
-ترسنم الان بؤگی که مرن زنکه'م، نه مرکه! تۊ د کی هیسی، کناپس! تازه خۊبه که دانشگا بؤشؤ آدمی! نه أدأش، میلکا یته اصیل ؤ خؤشنژاد نرˇ سک هیسه! جنگ ٚ مئن هیچ سکی اینء پیشاشؤ مننه. ای شرایطˇ همرأ تۊ هنده گۊنی این نر نیه!
-بخشنی میخاییل ایوانویچ، تۊ مره یته ور فرض بؤگۊده دأری.. تی رفتار مره رنجأنه..
-ایسه که ایجۊره، خۊصۊر بۊگذشتیم.. نخأنه بهینی! آدم مۊرغؤنه هنه تا یته مسألهء تره ولأجه؛ ترسنم چند دئقه د بؤگی که این، نه دۊم بلکه میلکا لنگ هیسه.. بۊگذریم أدأش.. مۊ خأسم لطفی تی وأسه بؤکۊنم. واخرامیف الکل!
سرپامۊج الکل بیأرد. وچهگل، خۊ پیالهٰنء پۊرآگۊدن ؤ فکرء بۊنآشؤن. حدۊدا یه نیمساعت تأم بزأن. ستوان هۊته که خۊ دیمء دچئه بؤ ؤ پیالهء نیا گۊد، گب دربۊمأ ؤ بؤگۊت:
-گیرم که ماده بؤبۊ، نه نر.. أزأ أزأ که ایواوده گب زنی! آخر اینˇ ماده بؤؤن که تره ویشتر فایدهئه! تره ره کۊتکه چینه. کۊتکهشانء هرتهء راحت تۊنی ۲۵ رۊبل بفرشی .. کیء که نوأستهبۊ بهینه؟! تازه نفهمنم که چیچره هندی نرˇ سکء خۊش وگیتی؟ مئلی سکان هیزار پا نر ٚ سکانء پیش درن.. هم قدرشناستر هیسن، هم مهربؤنتر.. خؤ ایسه مادهء هندی بد دأری، تۊ ۲۵ رۊبل هدی.. .
-نه جؤن.. حتی یهقرن أنی پۊل ندنم.. اولا أسأ سک نخأنم، دوما پۊل ندأرم.
-ای گبء خأس هۊ اولگرش زان د! میلکا، ورس بؤشۊ اۊرا!
سرپامۊج اۊشان ٚ ره مۊرغؤنه-دیشکین بیأرد. وچهگل خؤردنأکتن ؤ بی اۊنکه گب بزنن، مۊرغؤنهء بۊخؤردن ؤ خۊ نؤنˇ همرأ کلیبیج ٚ سینهء پیته بکشئن. ستوان هۊته که خۊ مچهء تمیزآگۊد، بؤگۊت:
-کناپس، خۊجیر جوانی.. دۊس ندأرم دسخألی وگردی خؤنه.. دؤنی، هیچی تی جی هنگیرم؛ سکء هیته بؤبۊر!
کناپس آه دؤبؤر آوجأدأ:
-آخر کۊیه بؤبۊرم؟ جا ندأرم.
-خؤ ایسه که تره نوأنه چی شأنه گۊدن! مردهشۊر تره بؤبۊرد! ایسه که نخأنی.. خا نخأسهبۊ.. کۊیه شؤ دری؟ یهپاره د بنیش می ور.
کناپس کش ؤ قؤسی بؤگۊد، خۊ جا سرˇ جی ورسأ، خۊ کۊلاء وگیت ؤ دهنبلا کشان بؤگۊت:
-د وأن بؤشۊم، خداحافظ..
-یه دئقهٰ بئس. مرن تی همرأ هنم.
لباس دؤگۊدن ؤ محله دکتن. یه چند هلنگ تأمبزأر را بؤشؤن. ایمه ستوان گب دربۊمأ ؤ بؤگۊت:
-بئینم کسیء شنأسنی که شأسهبۊ سکء وره هدأن؟ هۊجۊر که بئدی، میلکا هم اصیله، هم خۊشنژاد ولی.. قطعا می وأسه بکار نیأنه.
-نه جؤن کسیء نشنأسنم.. می آشنا کمیه دؤبؤ ای شهرˇ مئن؟
وچهگل اۊ بۊجؤر تا کناپسˇ خؤنه برˇ سر تأم بزأن. فقط اۊ زمت که کناپس، ستوانˇ دسء فشلد ؤ خؤنه درء واگۊد، دۊبؤو یته سرفه بؤگۊد ؤ نااۊمید بؤگۊت:
-راسئه دؤنی که ایجه سلاخان سک قبۊل کۊنن یا نه؟
-قاعدتا وأن قبۊل بؤکۊنن.. البته مطمئن نیئم.
-فرده هدنم اینء واخرامیفˇ دس که بؤبۊره کۊشتنگا. جهندم! بدأر این ٚ گؤلیء وزرأنن.. یته نفرتانگیز حیوان هیسه! خیلی نفرتانگیز! ایمه، خؤنهء کثیف کۊنه؛ دیرۊ أنی هرچی یخچالˇ دل گۊشت دؤبؤ، بۊخؤرد.. هنده رسلأ أخر این ٚ نژاد خۊب بی، شأس یهکاری گۊدن، ولی أسأ معلۊم نیه کی بچئره. خۊک ؤ سک ٚ کس بۊخؤرده هیسه. خؤ، شؤو خؤش!
کناپس أنی آوجأدأ:
-شؤو خؤش!
خؤنه در محکم دبسته بؤبؤ ؤ ستوان تنها بۊمؤنس.
پایان.
