بخساد

سه شنبه, ۲۱ بهمن ۱۳۹۳، ۰۵:۲۷ ق.ظ

۱

پوشتˇکنکوری

سه شنبه, ۲۱ بهمن ۱۳۹۳، ۰۵:۲۷ ق.ظ

پیش دانشگاهی بؤم ؤ پوشتˇکنکوری؛ تازه زمستان وکته بؤ، أمی امتحاناتم شروع وکته بؤن، وأرش هم یک هفته ای بؤ که هوته وأرست، مرم خو اتاقˇمئن نیشته بؤم ؤ خو امتحان درسانه خؤنده دؤبؤم ؤ غافل از اینکه دونیا خأنه مره به یته چالش بکشه چالشی که اونˇمئن زیویش دؤبؤ

چاشت بؤخؤرده پسی، بدئم أمی پنجره پوشتˇرأ مره دؤخؤنن ؤ فیشه صدا هنه، پنجره' واتم بدئم أمی همسایه وچه " مرتضی " هیسه، مرم درس ؤ کتابه ویلاتم بزأم بوشؤم بیرون ؤ مرتضی گلأکتم

کسنˇهمرأ هوته گب زأ دبیم ؤ شؤ دبیم لات که یهؤو سردرکه جی بدئیم گالشان خو گوسوندکؤنˇهمرأ همأ درن، بیشئیم پیش تر ؤ هوته که پیش شؤ دبیم مو فکراشؤم
"چندی خوب بؤ نابؤ که أمرم خؤره ره چنتی گوسوند بدأشته بی ؤ خؤره اوشؤنˇهمرأ مشغولاته بی"
هیته مو ای فکرانه مئن دؤبؤم که بدئم گالشانˇسره مئن هیسأیم ؤ جیرأ جی خیلی دورأبئیم

ده شبات دؤبؤ ؤ خورشیدم سماموس کؤ پوشت جی غروب بؤته بؤ مرتضی مره دؤخؤند ؤ بؤگوت : سهیله هؤؤؤؤ ده شبات دره بیشیم خؤنه

مرم هوش دننه بؤم هوته نوأسته بؤر بؤتم آها بیشیم تا دیرأنؤبؤر، خلاصه خو رأ کجاتیم جیرأ ؤ هوته که هو لاتˇرأ که وگرسته دبیم مو در بومأم مرتضی بؤتم : چی گونی امتحان بدأ پسی أمرم خؤره گوسوند هأیریم ؤ مئنأکیم ؟؟ مرتضی'م که اونˇدیل دکته بؤ تا می گبه بیشتؤوست مره بؤگوت آها اگه ایته وکه چی وکنه، دباقی را تا جیرأ أمی گب وکته بؤ گوسوند ؤ گوسوند گالشی تا خؤنه نرسأر آمو تاریخ گوسوند هأیتن ؤ مکان کؤلؤم چاتن ؤ چرأ بوردن ؤ اسأ همه' مشخصاته بیم

خلاصه امتحان تمنابؤ، کسنˇهمرأ بیشئیم چهارته وره هأیتیم که دو ته مرتضی شی بؤ ؤ دو ته'م می ، حلأ ورأکؤنه خؤنه نیأرده بیم که دکته بیم مردومˇباغ ؤ بلاغانه مئن، ورأکؤن چرستن ؤ أمرم شوق و ذوقˇهمرأ اوشؤنˇچرستنه نیا گوتیم

 

جوری ورأکؤنˇهمرأ گلأکته بیم که انگار نه انگار آمو سو ماه ده با بیشیم کنکور بدیم، چون گوسوند هئنˇسر خو پئرمأره قول بدأبیم که خو درسانم خؤنیم هیندؤنی، گوسوند چرأندنˇسر خو کتابانم خو همرأ بورده نابیم ؤ آمو خؤره واشˇسر درازه نابیم ؤ درس خؤندیم ، ورأکؤنم هو واشانه چرستن

صوب سر حلأ آفتاب در نومأر خوابˇجی ورسأ نابیم ؤ خو گوسؤندؤن ؤ کتابانه گله گیتیم ؤ شئیم مردومˇباغ ؤ بلاغانˇمئن هوته هیسأ نابیم تا چاشتˇسر، چاشت که بؤنابؤ همأیم خؤنه پلأ خؤردیم ؤ هنده چاشت بؤخؤرده پسی ایتفأ شئیم لات ، ورأکؤن خؤردن آمو خؤندیم، ورأکؤن واشه خو دهنˇمئن نوشخار گوتن آمو درسه خو ذهنˇمئن مرور گوتیم، غروب سر دیمه همأیم ورأکؤنه کؤلؤمˇمئن دؤت نابیم ؤ خؤره شئیم ولگ زنی

هر نوع ولگی که هر فصل ؤ ماهی مئن در همأ نابؤ ، فیکا ولگˇجی بگیر بیه تا توت ؤ تبریز ؤ لی ؤ پرتغال ؤ اسأ هرچیزی که زأ شأست حتی بوله'ن، آمو اوشؤنه زأ نابیم ؤ ایمه بسته گوت نابیم ؤ هورده نابیم کؤلؤم مئن درگنته نابیم تا او دو سو روز در هفته ای که مدرسه شؤ نابیم نأبدأ ورأکؤن وشنأیی بئسن

توت ولگؤنه اول خأست ای زئنی آفتابˇمئن وأرگنی تا دبلاسن ایمه بؤبوری ؤ درگنی، هر شب هم خأست ورأکؤنه سوبوس ؤ جؤو هدی ، ورأکؤنم هر یکی خؤره وکته بؤن یته نر وره، وقتی جؤو خوردن تورابؤ نابؤن ؤ جفتک زأ نابؤن ؤ کسنˇهمرأ جنگ گیت نابؤن ؤ أمرم کیف دأ نابؤ

... می دیل او روزانه ره تنگابه

موافقین ۰ مخالفین ۰ ۹۳/۱۱/۲۱
بخساد

نظرات  (۱)

آخَر بَسی چی بوکودین ؟ وره ئان َ سرلبین و کباب بوکودین ؟ یا پروار بوکودین و بوفروختین ؟ 
چوپانی هم خوره حالی داره . البت انبیا شغلم بو 
پاسخ:
بفرتیم بیشئیم دانشگاه :)

ارسال نظر

ارسال نظر آزاد است، اما اگر قبلا در بیان ثبت نام کرده اید می توانید ابتدا وارد شوید.
شما میتوانید از این تگهای html استفاده کنید:
<b> یا <strong>، <em> یا <i>، <u>، <strike> یا <s>، <sup>، <sub>، <blockquote>، <code>، <pre>، <hr>، <br>، <p>، <a href="" title="">، <span style="">، <div align="">
تجدید کد امنیتی